Қазақстан Республикасының жаңа сайланған Президенті Нұрсұлтан Назарбаевты ұлықтау рәсімі 8 сәуірге белгіленді.

«Сіздердің назарларыңызға 2011 жылдың  3 сәуірінде өткен Қазақстан Республикасы Президентінің  кезектен тыс сайлауында сайланған Қазақстан Республикасының Президенті Нұрсұлтан Назарбаевтың Ант беру күнін айқындау туралы қаулы енгізіліп отыр. 2011 жылдың 3 сәуірінде өткен Қазақстан Республикасы  Президентінің кезектен тыс сайлауында сайланған Қазақстан Республикасының Президенті Нұрсұлтан Әбішұлы Назарбаевтың Ант беру күні - 2011 жылдың 8 сәуірі болып айқындалсын»,-деді ОСК хатшысы Бақыт Мелдешев бүгін, 6 сәуірде өткен ОСК мәжілісінде.

Бұдан бұрын хабарлағанымыздай, ҚР Орталық сайлау комиссиясының нақты қорытындысы бойынша 2011 жылдың 3 сәуірінде өткен Қазақстан Республикасы Президентінің кезектен тыс сайлауында Мемлекет басшысы Нұрсұлтан Назарбаев сайлаушылардың 95,55 пайыз дауысын жинап, жеңіске жетті.

ОСК төрағасы Қ. Тұрғанқұловтың айтуынша, Нұрсұлтан Назарбаевқа сайлауға қатысқан 8 миллион 279 мың 676 сайлаушының 7 млн.  850 мың 958-і дауыс берген. Ал Мемлекет басшысының лауазымына таласқан Қазақстанның Коммунистік халықтық партиясының хатшысы Жамбыл Ахметбековке сайлаушылардың  1,36 пайызы немесе 111 мың 924 адам, «Табиғат» экологиялық одағының төрағасы Мэлс Елеусізовке 1,15 пайызы немесе 94 мың 452 адам, ал Қазақстан Патриоттары партиясының төрағасы, Сенат депутаты Ғани Қасымовқа 1,94 пайызы немесе 159 мың  036 адам дауыс берген. «3 сәуірде елімізде өткен ҚР Президентінің кезектен тыс сайлауына республикамыздағы сайлаушылардың 89, 99 пайызы қатысты», - деді ОСК төрағасы.

Айта кетейік, 3 сәуір күні Қазақстанда ҚР Президентінің кезектен тыс сайлауы өтті. Республика бойынша   таңғы сағат 7.00-де барлық сайлау учаскелері ашылды, олар  кешкі сағат 20.00-ге дейін жұмыс істеді.

ҚР Орталық сайлау комиссиясының мәліметінше, елімізде сайлаушылардың тізіміне 9 миллион 200 мың 298 сайлаушы енгізілген.  Сайлаушылар республикадағы 9 мың 725 сайлау учаскелерінде дауыс берді. Сонымен қатар тысқары жерлердегі еліміздің азаматтары Қазақстанның шет мемлекеттердегі дипломатиялық өкілдіктерінің жанынан құрылған сайлау учаскелеріне барып, өз таңдауларын жасады. ҚР Президентінің кезектен тыс сайлауын 1059 шетелдік және халықаралық ұйымдардың байқаушылары мен Сыртқы істер министрлігінде тіркелген 200-ден астам бұқаралық ақпарат құралдарының өкілдері бақылады.