Малидің солтүстігіндегі Тимбукту қаласында исламшыл экстремистік "Ансар ад-дин" тобының өкілдері жеті жыл бұрын салынған екі мазарды қиратып тастады.

Исламшыл содырлар "құдайдың әмірін орындау үшін биіктігі жерден 20 сантиметрден асатын кез-келген мазарды қирататынын" айтады. Топ өкілі Тимбукту тұрғындарының "құдайға сыйынудың орнына мазарларға табынатынын" алға тартады.

Осыдан он шақты күн бұрын "Әл-Қаидамен" байланысы бар салафилік "Ансар ад-дин" тобының жауынгерлері жергілікті халық қасиетті деп санайтын сопылық ағымның екі ғалымының мазарын қиратып тастаған еді. 

Тимбуктудегі сопылық мазарлар ЮНЕСКО-ның дүниежүзілік мәдени мұраларының қатарына кірген. Шариғатттың қатаң заңдарын ұстанатын "Ансар ад-дин" сопылық ғалымдарға тұрғызылған мазарларды "исламға жат" деп санайды.

Халықаралық қылмыстық сот мәдени және тарихи ескерткіштерді қирату әскери қылмыс болып саналуы мүмкін екенін ескертті.