ҚР Мемлекеттік қызмет істері агенттігінде Экономикалық ынтымақтастық және даму ұйымы мен Еуропалық одақтың қолдауымен «Қазақстанда жоғарғы басқару корпусын құруды қолдау» тақырыбындағы екі күндік семинар-кеңес өтуде.

Жиын барысында Қазақстандағы басқару корпусын қалыптастыру, мемлекеттік қызметкерлердің жұмыс сапасын үш мемлекет - АҚШ, Польша, Бельгия елдерінің тәжірибелері үлгісінде бағалау мәселелері талқылануда. Сонымен қатар басқару лауазымдарына кадрларды сапалы іріктеу мәселесі бойынша  Экономикалық ынтымақтастық және даму ұйымы елдерінің жалпы тәжірибесі назарға алынбақ.

Семинар нәтижесі дамыған елдердің тәжірибесін сараптап қана қоймай, «А» басқару корпусын құру және басқарушылар қызметінің тиімділігі мен есеп беруін бағалау, «А» корпусы мемлекеттік қызметкерлерін оқыту және олардың корпоративті мәдениетін арттыру бойынша нақты шараларды анықтауға мүмкіндік беретін болады.

Алқалы жиын жұмысына Президент Әкімшілігінің, Үкіметтің өкілдері, Парламент депутаттары, орталық мемлекеттік органдардың жауапты хатшылары мен қызметкерлері, сондай-ақ халықаралық сарапшылар қатысуда.